Oh, it´s a Feh!
Jo, Bolliwuud is wieda augsogt, es Kino in Millenium Taua soi hoch lem! Und da zoit sis aus, wamma si de XXL Famülienpockung vo de Feh in Soi mit eina nimmt, weu so schnö konnst gor net Happy Dilwale sogn, zans da de Schneiztiachln a scho da Reih noch ans auf ondare aus da Toschn und druckns da auf de Eigln.
Natirlich drahns a dermoi wieda voi auf, owa da Karan Johar warat ned da Karan Johar, wanna ned unta oi de angrotztn Schneiztiachln a woahoftige, eanst gmante Gschicht mit da an oda ondan blitzgscheidn Eilog zu den dazöhlat, wia se a tiafe Freindschoft mit da Liebe (bitte mit an großn Meidlinga Lll lesn) vatrogt oda em a ned. Und des mit junge frische Figuan, leiwaunde Schmäh und ana Kokettn, wia mas bei de Inda a heit no sötn siacht.
De beidn Hauptdoastölla spün olle zwa mitarananda groß auf, de oide Miss India schau a vuabei. Und da Kenich Khan zagt an dann a no, dass a guada Schauspüla nua fünf Minutn dafia braucht, dassa an de Tränanrearln endgütig trockn legt. Dea Hundling, dea. Wos auslost, san wia bei olle Bolliwuud-Füme in de letzn Joa de Gsangln, de wos es Aufmaschaln auf des, wos de Inda fia modean hoitn, ned iwastondn hom. Juroträsch homma söwa.
A bissl nutzloses Wissn fian Hamweg: An offiziön iwasetztn Titl gibts kan, owa es haaßt so ungefeah, doss es Heaz a schware Partie is. Und de zweite Höftn vom Füm spüt zu an großn Teu in Wean. Weas hättat wissn woin.
IND 2016. Regie: Karan Johar. Buch: Karan Johar, Niranjan Iyengar. Darsteller: Ranbir Kapoor, Anushka Sharma, Aishwarya Rai Bachchan, Fawad Khan, Lisa Haydon, Shah Rukh Khan. 177 min.
Füme, dies eich dazu furtbüdendaweis auschaun kennts:
(draufklickn, und es kummts zua Internet Movie Database)
Le Füm-Blog 