Da Meista Hitz is a Höd fia mi. Vua dreizehn Joa hota mit KALTFRONT an vo de bestn Füm vom damois no jungan Neichn Estarreichischn Füm gmocht und is dafia – wia sa se des bei uns so gheat – urndlich ogstroft wuan, ma hot eam afoch auglant lossn. Owa: Da Hitz is zwora Piefke, lebt owa scho long gnua bei uns, dassa vo de estarreichischn Fuaßboina ans gleant hot: aufgem tuat ma nua an Briaf.
Und jetz hota wieda voi in Lauf, und des mit an gonz an sötanen Vogal, an estarreichischn Seienz Fiktschn Füm. Und ea hot se guad auf des eigstöt und si gonz sicha a poa moi BRAZIL ins Hian ghaut. Des meakst a, owa des is okee, des gheat dazu, dass ma waaß wos guad is und dann gschickt oschreim tuat. Solang es End passt. Kloa is, dassa fia des wieda ogstroft wiad wean missn. Weu auschaun tuat si des natirlich kana. Wo kamat ma do a hi?
De stün Reseaven, vo de wos die Red is, san Leit, de wos ned steam diafn, weus Negarantn san. Wann sa se anschickatn, de Radi vo untn zum zupfn, weans an Kabln und Schleich aughängt und weida vawendt. Zum Beispü ois Leihmutta, oda zum Ausbadln oda a fia de Klaud zum Datn speichan. Im Füm sogns nämlich, dass es menschliche Hian a supa Datnspeicha warat. Oiso i kenn gnua Leit, de kenntn goa ned so nega sei, dass mas fia iagendwos und scho goa ned fira Hianoaweit vawendn kunntat. Owa bitte, is jo Seienz Fiktschn. Gegn de Vawuaschtung kaunnst di owa vasichan, mit ana Todesvasicharung. Und sowos vakauft da Hauptdoastölla, dea wos si dann owa natirlich mit an Madl eilossn muass, de wos olle Hinnichn wieda aus da Legebattarie ausselossn mechat.
Mi hot de Gschicht taugt, des is jo a genau a so a doikata Eifoi, wira denan Voipoidln amoi kumman kenntat, de wos heit BeWeEl stukkatian, mit an Kreizaltest oschliaßn tan und dann glaum, se wissn wia de Wöd rennt. Dazua passt jo grodaus, dass in den Füm ana, dea wos beföadat wean wü owa oglehnt wiad, dafia glei owegstuft wiad, weu ea jo in seina oidn Hockn nimma hätt weidaoaweitn woin. Des is genau sowos, wias an vo de ogschlecktn, gspritzn Konsalting-Oaschlecha eifoin tatat.
Und da Hitz serviat uns dazua a Mustabeispü wia ma mit goa kana Marie an Füm mocht, dea wos noch urndlich Geaschtl ausschaut. A leiwaunde Mischung aus mit da Gamera aufn Punkt gfümt, fließend gschnittn und dazua klane, owa feine Aufbautn, aus denan a diastares, dreckiges Wean entsteht, des wos ma kaum wieda erkennt. So gschickt gmocht, dass d ned meakst, wia büllüch da Füm eigentlich gwesn sei muaß.
A wundaboares Beispü fia des is a Szenan, wo de Hauptdoastöllarin traurich zhaus hockt. Mia steign in de Szenan ei, wia grod a Schoiplottn featichgrennt is, da Tölla si no weida dreht, und mia hean nua es knacksn vo da Plottn. Aus da hoibat sichtboan Plottnhün und an Plagat an da Wand, kemma messaschoaf schliaßn, dass de Hauptdoastöllarin grod a Gsangl vo ana schwoazzn Tschässängarin gheat hot (es miassat de Ella Fitzgerald gwesn sei, owa da Gameraschwenk woa recht gschwind). Wanns a so a Liadl im Füm gspüt hättatn, hättatn sa se woascheinlich ausbrennt (und hättatn se a glei zua Wiedavawuaschtung austön kenna), owa duach de Reschie host oisa Zuaschaua trotzden es Gfüh, du hättast de Plottn grod wirklich gheat.
De Zukunft wiad owaflächlich mit a poa technische Eilogn, a poa Hinweisschüdln und ana Ghetto-Stimmung aufzagt. Wos ned glei auffoit, is, wia gschickt de Zukunft duach es Vahoitn vo de Menschn doagstöt wiad. Scheinboa is ned vü Untaschied zu heit, owa mit da Zeid kriagst mit, se vahoitn si … ondas. A bissl untaküht, voi aufgongan in ana Wöd, wo da Mensch nua mea a Hjuman Risors is, und si eigentlich kana mea fia nix intaressiat. Es passt ned ois zsamman, wia sa se vahoitn, es is scheinboa ned logisch – owa i kau ma guad vuastön, dass ma des genauso gspian tatat, wenn an jetz a Mensch aus da Zeit in dressich Joa begegnan tatat. Da Hauptdoastölla schaut ois ois wira dunklgraua Bürorozz wia aus BRAZIL oda DER PROZESS, redn tuata wira Schauspüla aus de fuffzga Joa, de Keapasproch is de gleiche, wias in Füm meist in Hermann Göring zagn, dafia is a owa unta da Ansapania tätowiat. Und des bringt genau des Fremde, Unbekannte, des da Füm braucht.
Am End valosst si da Meista Hitz leida a bissl zseah aufs Offensichtliche und de immagleichn Kino-Standards, oizuweid geht da Füm iwa de Ausgangsloge ned hinaus und ois deafst a ned genau hintafrogn. Oiso kemma es fünfte Steandal nua zua Höftn ins Mitteilungsheftl pickn. I gfrei mi scho aufs nächste Moi, owa bitte ned wieda dreizehn Joa woatn lossn!
Ö 2016. Regie & Buch: Valentin Hitz. Darsteller: Clemens Schick, Lena Lauzemis, Marion Mitterhammer, Daniel Olbrychski, Stipe Erceg, Simon Schwarz, Dagmar Koller. 96 min.
Füme, dies eich dazu furtbüdendaweis auschaun kennts:
(draufklickn, und es kummts zua Internet Movie Database)
Le Füm-Blog 
Passt!
Sauberer Film, absolut treffende Kritik. (Ja, das mit der gerade gespielten Platte passt auch ganz genau).
Danke für den Filmtippppp. (Ohne Eure Kritiken hätte ich den wohl kaum gefunden ).
Biete eine Wette an: Innert 5 Jahren gibt es davon ein Hollywood-Remake.
Wer wohl die Hauptrollen spielen werden? Regie?
Vorschläge?
LikeGefällt 1 Person
Ahhh, noch einer:
Die Idee, bei einer nicht erfolgreichen Anfrage, die Karriereleiter aufwärts zu steigen herabgestuft zu werden, scheint mir auch in unserem System sehr plausibel zu sein: wird ja auch ‚gut begründet‘: Sie sind mit Ihrer jetzigen Position unzufrieden. Wenn Sie nicht befördert werden, werden Sie nicht mehr so effektiv und motiviert wie ein junger Mitarbeiter auf der Position sein. Also logischerweise Degradierung. Ich warte darauf, dass das demnächst in einer neukapitalistischen Firma umgesetzt wird und das Konzept als ‚innovativ und motivierend‘ verkauft wird. Google vielleicht? Und danke für den BWL-Vergleich! Bussi aufs Bauchi, Andreas
LikeGefällt 1 Person