JERUZALEM

Apokalüps Nau!

Den Füm hots glaub i letztens an anzichn Tog in Kino gspüt, ansunstn is a jetz auf DeVauDe aussekumman. Des mochns efta in letzta Zeit, vua oim mit Horrorfüm. Owa do muasst genau an den Tog draufkumma, sunst host scho valuan. I hob valuan. Is schod, weu de Büdln waratn in Kino guat kumman.

Scho wieda a Faund-Futätsch-Gruslinger, dermoi aus Israel, und des hots no goa ned gem. Ma sicht ois duach de Smartbrün vo da Hauptfigua. Daduach wockets no mea ois sunst. Und de Brün wiad a gegn End zua hinnich und mocht nua mea Büdln mit Fehlan, und des hätt i ganz gean auf da großn Leinwand gsegn. Woascheinlich hätt i bei dera Wocklarei eh nua in bochanen Emmentola vom Obndessn oisa hoibflüssiga vuan Kinositz am Bodn glegt, owa des waas ma weat gwesn. Außadem: Waunn i vuan Feanseha speib, muassis söba aufwischn, im Kino ned. Dafia homma jo de Dienstleistungsgsöschoft…

De Zombie- und de Älien-Apokalüpsn homma scho besprochen und a dass des eha gschissn orennt. Jetz leanan mia, dass ma se de biblische Apokalüpse a ned winschn soitat. Owa des homma eh scho in Religionsuntarricht gleant, wea gongan is. Vü Szenan spün auf de Stroßn vo Jerusalem – mi wundat jo, dass duat übaroi ham drahn diafn, sogoa an da Klogemaua. Ob de Via Dolorosa a in echt de Via Dolorosa woa, kau i ned sogn, des is scho zlang hea, dass i duatn durchkreut bi. Und a Stroßnschüdl hängst leicht amoi auf.

Leida fangt de Apokalüpsn erst nach fuffzig Minutn au, wos in Füm scho de easte Dringlichkeit nimmt. Owa daunn hupfn endlich de Teufaln mit de Fledamausfliagaln voi motiviat durch de Stroßn wia sunst nua de Engal uman Christbam. Ansunstn is eh ois wieda wia bei da Zombie-Apokalüpsn. Da Reschissöa hot a es Ausmoibiachl fia gstondane Gruslinger dabeighobt. Is eh lustig und a es Ende is an sich supa, ma hätt owa no mea draus mochn kenna. Trotzdem kau ma si des auschaun, wamma ned woswaaßi fia Ausprüch stöt.

ISR 2015. Regie & Buch: Paz Brothers. Darsteller: Danielle Jadelyn, Yael Grobglas, Yon Tumarkin, Tom Graziani, Fares Hananya, Itsko Yampulski. 94 min.

Füme, dies eich dazu furtbüdendaweis auschaun kennts:
(draufklickn, und es kummts zua Internet Movie Database)

CLOVERFIELD   

THE MIST   (Der Nebel)   

THE OMEN   (Das Omen)   

THE PASSION OF THE CHRIST   (Die Passion Christi)   

THIS IS THE END   (Das ist das Ende)