De Babsi is jo do de beste. Und damit man i ausnahmsweis ned de unsrige Babsi, de wos bein Füm-Blog imma brav Kommentare schreim tuat, weu de sowieso. In den Foin man i bsundas de Barbara Albert, de wos ned oft an Füm drahn deaf, dafia bis auf amoi no nie danebn ghaut hot und untan Strich bei uns woascheinlich de is, de wos am bestn Füme mochn kau. Wammas lossat…
Es wisst´s eh, dass um a schasaugate Klaviaspülarin gangat, de wos bein Wundaheula Mesmer segn leant, wos dann owa a wieda ned oin recht warat. Und wann ned, dann wisst s as hoit jetz. De Albertina hot in den Füm fia de Vagonganheit des gschofft, wos da Gilles Villeneuve im BLADE RUNNER 2049 fia de Zukunft gschofft hot: A ondare Wöd aus ana ondaren Zeit zum vuafian, de wos uns im söwn Moment so fremd ois wia vatraut vuakummt, owa de a präsent und in sich söwa logisch is. Im Gegnsatz zu de sonstign Oide- Fetzn-Füm kummt des in kana Sekundn steif und theataoatig dahea, du glaubst de gonze Zeit, du warast mittndrin und kunntast in Grind riachn und de Viechaln auf da Kopfhaut krowln gspian…
A Tuampepi allanich mocht a no ned froh. Wegn de Leis warats gwesn.
Ob si des a wiaklich ois so zuatrogn hot und ob de Leit damois wiaklich so drauf woan, des waaß i natirlich ned, i woa jo gottseisgepriesen ned dabei. Es is owa fasziniarend, denan Leit zum zuaschaun, wias anaseits in an söbstbautn Häfn aus Voauateun, doikate Regln und aufgsetzte Heflichkeitn umarandatoakln, dafia bei ondare Gelegnheitn eanare Gfüh so theatralisch vua si heatrogn und ins Platzn kumman, dass si a Buagschauspüla schenian miassat. Ma haut si a o, wann s imma genau dann, wann sa se bsundas bled auhuachat, unbedingt wos auf Französisch eibaun miassn. N´est-ce pas?
De Gschicht söwa is stoak und genau mit da richtign Senisibi … Selnsib … min richtign Gfüh dazöht, mit an guadn Eigl dafia wia gschissn damois mit de Marodn, de Oamen und de Weibsbüda umgangan wuan is. Des geht an scho an de Niandln. I befiacht jo, dass de Leit, wann in zwahundat Joa de Replikantn-Albertina an Füm iwa uns draht, iwa uns a ned bessa denkn wean. Obwoi eigantlich soitat ma des jo hoffn, weu dann warat wos weidagangan…
Ö 2017. Regie: Barbara Albert. Buch: Kathrin Resetarits. Darsteller: Maria Dragus, Devid Striesow, Maresi Riegner, Katja Kolm, Lukas Miko, Susanne Wuest. 97 min.
Füme, dies eich dazu furtbüdendaweis auschaun kennts:
(draufklickn, und es kummts zua Internet Movie Database)
Le Füm-Blog 