Jetz hob i ma auf de Gache do no a Netzfix-Probe-Abonnemau owelodna miassn. Und des in mein Oita! Weu so recht tuat ma des jo ned taugn, dass ma si imma mea Füme, nämlich a große Füme, nua mea im Schtriming gem kau. Fia mi bleibt es Gino es Gino, und wann da Feanseha so groß warat, dassa von Wohnzimma ums Eck bis ins Kabinett reichat. Ondaraseits kennan vü Fümemocha nua mea so de Marie fia Füme aufstön, wo kane Strumpfhosinga vuakumman.
Jednfois woa des jetz grod bsundas dringend notwendig, damit i man den Füm dodan einehaun kau. Wea hättat si des docht, dass mia uns in Joa 2017 no amoi an neichn Füm min Sunkist-Kid und da Barbarella eineziagn deafn? Fuffzich Joa, nochden dass de bloßhapat duachn Augoatn ghiascht san? Ea hot ma jo oisa klana Bua scho taugt, weu i a des Sunkist liawa ghobt hob ois de Orantschad. Ausn Tetrapackl natialich. De san ja dann a a großa Schponsoa vo an Fümfestiväl in Ameriga wuan. Und de Barbarella … na dazu sog i jetz liawa nix, sunst geht´s ma wia in Kevin Spacey und da Ridley … äh da Wauzi tuat mi ausn Fümblog ausse retuschian und min Julian Schmid austauschn, dea brauchat eh a neiche Hockn.
Oid samma wuan:
Es Problem vom Füm woa dann owa, doss vuahea mea zum sogn gem hot ois nochhea. Da Sunkist is uandlich übawuzlt und de Barbarella a a oide Fee, de wos beide nemaranda wohnan und si auf a Packl haun weu eana allanich fad is und koit in da Hapfn. Und vü mea rennt a ned o. Des is ois eh okee, grod so, dass d ned eischlofst, owa hoit so vü hoamlos und tut kan weh. De Gschicht weicht olle Reibarein scho zwa Kilometa vuahea aus, grod da Barbarella Junior tuat a bissl schimpfn, owa eh auf liab. Fia Leit, de wos z oft an frira denkn tan.
USA 2017. Regie: Ritesh Batra. Buch: Scott Neustadter, Michael H. Weber. Darsteller: Robert Redford, Jane Fonda, Iain Armitage, Matthias Schoenaerts, Judy Greer, Bruce Dern. 103 min.
Le Füm-Blog 