Jo, deafns denn des deafn? Kau ma des kennan? Miassat ned wea was miassn? Deaf a Holocaust-Forscha a Oaschloch sei? Deaf a Auschwitz-Iwalebende liawa iwa ia Nosnkorrektua redn woin ois iwa Auschwitz? Deaf ma vua an KaZet-Büdl französische Keks hawan? Deaf ma vuan Flaktuam in Augoatn Buaschnschoftla vaoaschn?* Und deaf ma an Schenklprackafüm iwa an Holocaust-Forscha drahn, dea wos a Oaschloch und a Hefal is und dea wos si in da Vuaberreitung fia an Holocaust-Kongress mit Auschwitz-Iwalebende umarandaschlogn muass, de wos iwa Nosnoperationan redn woin, dazu mit Sponsorn, de wos den Auschwitz-Iwalebendn am Rednapuit Mercedes-Stean umhängan woin, mit augsoffane Buaschenschoftla vuan Flaktuam in Augoatn und vua oim mit ana komplett augrenntn französischn Gastassistentin, de wos an Hoß auf de Deitschn hot, umarandazickt ois wia, en Schnowe in ana jedn Sekundn offn hot und in Schef vom Oaschloch bumst? Und deaf ma in so an Füm a no blede Schmäh iwa Hundsviecha mochn, de wos aus an Auto fliagn und si in Plutza auhaun?
Sicha.
Easchtns sowieso, und wann da Füm dann deamoßn a Koal is und trotzdem ned deppat und ois Drama a no funktioniat, dann eascht recht. Ma waaß goa ned wia an gschiacht, so sea hauns an gscheide Schmäh, bülliche Schmäh, dramatische Eilogn und a Nochdenkliches wüd duachgmischt um de Uan, dass d as nua so aulegst. Vuam Kino miassts no amoi es Beischl guad duachlüftn, weu während in Füm weads ned vü zum Lufthoin kumman.
Unglaublich a de Schauspüla. Da Lars Eidinger is sowieso ane vo de großn Entdeckungen in letzta Zeit. Dea frißt die Roin auf ois wanns sei letzta Füm warat. Und des is ka leichte Roin, weu de Figua hot sovü Gsichta, owa da Lars schoffts, dass ma sogoa mit den ignorantn Oaschloch a Mitleid hot. Eastaunlich, wia sea de Figua an de Hauptroin vom MANCHESTER BY THE SEA erinnan tatat, dea wos a grod im Kino rennt. Wann dea duatn ADeHaEs ghobt hättat. De kenntn Briada sei. Moment – des haaßta jo, dass jetz owa da Lars da Bätmän sei miassat. Naa, duat woin ma goa ned higehn.
A Natuagwoit a de Adele Hendl. Bei de Frantzn diafat de jo scho a große Numma sei, i hobs no ned kennt. I hob ned gwusst, is des a Deitsche, de wos ganz supa a Französin spüt, de wos Deitsch red, oda do a echte? Fia soichane Roin kriagst normalaweis in Oscar. Fia an deitschn Füm natirlich ned.
Wann da Hausmasta Krause si in da letztn hoibn Stund a bissl zruckghoitn hätt und ned no a Thema und no a Thema ins Biachl eineghaut hätt und duach des letzlich ned ganz kloa is, wo da Füm eigentlich hätt hiwoin, dann breichat ma iwan bestn Füm 2017 nimma nochdenkn und kenntatn uns es Kinogehn fia de nächstn öf Monat spoan.
* De anziche Frog, de wos ma ohne vü Iwalegn glei mit Jo beantwuatn kau. Schnö rennan soitast hoit kennan. Oda a Foahrradl dabei hom, wia de in Füm. Obwoi jo in Augoatn Foahrradln vabotn san. Buaschnschoftla owa ned. Do siechstas wieda.
D 2016. Regie & Buch: Chris Kraus. Darsteller: Lars Eidinger, Adèle Haenel, Jan Josef Liefers, Hannah Herzsprung, Sigrid Marquardt, Djenabuh Jalloh, Rolf Hoppe, Bibiane Zeller. 125 min.
Füme, dies eich dazu furtbüdendaweis auschaun kennts:
(draufklickn, und es kummts zua Internet Movie Database)
Le Füm-Blog 