Damisch kuntast wean iwa den Füm: In Bätmän sei Bruada oaweit jetz in Boston oisa Hausmasta. Bitschee, soi sei, ma frogt si scho, warum da Bätmän eam ned a bissl wos vo da Marie ogibt oda eam zumindest ois Hausmasta vo Wayne Manor austöt. Owa guad. Nua jetz wiads gfeanzt. Genau den Bruadan vom Bätmän tans auruafn, dass sei Bruada im Steam liagat. Wira dann hikummt ins Kronknhaus, hot da Bruada a scho de Potschn gschtreckt. Denkst da, oh Scheiße, zeascht da Supamän, und jetz is da Bätman a hi. Und des genau dann, wamma eam am dringandsten netich ghobt hättatn, jetz wo da Tschoka si mit da Russnmafia auf a Packl ghaut hot und si zum Präsidentn vo Ameriga hot wön lossn. Jetz kann ma eascht nochfühn, wia des damois bei de Karntna woa, wia eana de Sunn vom Himme owegfoin is. Schee oasch, jetz is ois aus, denkst da do. Nua wia ma dann de Leich untan Leintiachl segn, foits an wia Schuppn aus de Hoa: Des is jo goa ned da Bätmän!
Jetzt kennt si kana mea aus. Gibt´s no an drittn Bruadan? Geht des bei da Wayne-Fämili leicht so zua wia damois bei de Baldwins? Da hots jo a in Tick, in Trick und in Track Baldwin gem, und olle hams Füme draht. Jednfois geht de Gschicht mit den Hausmasta-Bruada weida, da Bätmän losst si ned auschaun. Vielleicht isa do grod am Weg noch Washington und bringt in Tschoka und de slowenische Ausgob vo da Harley Quinn zruck in Noarrntuam vo Arkham, wos highean. Na guad, hobi ma docht, dann schaust da de Gschicht amoi an, da Bätmän wiad scho no dazuakumman, i kanns dawoatn. Owa da Bätman is nimma kumman, dea Oasch.
Min Hausmasta jednfois hots wos, de meiste Zeit hängta umarananda wira nossa Poista am Fenstabankl, dem ois am Oasch vuabeigeht. Dann isa wieda a rechtes Zuanbinkal und trogt Wüdfremdn auf nix an Köch au. Ma denkt si scho, do is wos gschegn, und des hoit ois min Mäntschesta bein Mea zum tuan, wohin wos ea jetz zruck muass, si um sein Neffn kimman. Und wia sa se in an Füm gheat, miassn ea und da Neffe si zsammanrafn. Wia da Bätmän und da Robin quasi. Des wiad owa ois so noh am Lem dazöht, mit oi de klanan schenantn Peinlichkeitn und Auslossan, de wos a normala Mensch hot. Im Gegnsotz zum Bätmän zan Beispü. Und obwoi nix oizu bsundas passiat, hots do a unglaubliche innare Sponnung, dass ma no sötn bei an Füm so lad tan hot, dass aus woa. Dazu no de unfossboare untaschwölliche Sponnung, ob da Bätman jetz do no kummt oda ned.
Mia taugt in an Füm a imma sea, waunn si ana wirklich bemüht, bei olle Föhla und Schwächn, de wosa hot, es richtige zum mochn und anständig zum bleim, a Vaantwuatung zum zagn und ned de eiganen Suagn am Buckl vo de ondan zum auslem. Und dam it man i ned de üblichn ameriganischn Eafoigsgschichtn, wo ana, de wos kane Fiaß mea hot, in Waisnhaus aufgwochsn is und a no Legasthenika is, am End trotzden es de Wödmastaschoft im Kiaschkeanweitspuckn gwinnt. Na, es san de klanen Momente, wann ana, den wos eigentlich de Suagn auffressn und dem es Lem min Oasch ins Gsicht gfoahn is, trotzden in da Log is, de Suagn und Schmeazn vo an ondan zum reschpektian. I bin vua lauta Riarung sogoa bis zum End vom Nochsponn sitzn bliem, wos i in letzta Zeit nimma so oft moch. Es hättat jo aussaden sei kenna, dassa se se in Bätmän fia nochn Nochsponn aufghom hom. Bei de Ävenschas mochn sas jo a so…
Iwa des ois kau ma eana a poa klanare Ausalossa duachgehn lossn: Dass de Michelle Williams in ihra anzichn großn Szenan de innare Marilyn a bissl zu sea ausselosst oda dass da Longergan (wia imma in seine Füm) de oide Uaglmusik vü zlaut aufdraht. Und dass da Bätmän nie daheakreut. Außaden soit ma gesetzlich vabiatn, dass no an anzichs Moi in an Füm ana aus Zuan a Fenstascheim eischlogn deaf, des is es büllichste Klischee vo olle. No, vielleicht kimmat si da Tschoka drum…
USA 2016. Regie & Buch: Kenneth Lonergan. Darsteller: Casey Affleck, Lucas Hedges, Kyle Chandler, Michelle Williams, C. J. Wilson, Anna Baryshnikov, Gretchen Mol, Matthew Broderick. 137 min.
Füme, dies eich dazu furtbüdendaweis auschaun kennts:
(draufklickn, und es kummts zua Internet Movie Database)
Le Füm-Blog 
Pingback: linked up vol.4 – Heliocentric Bullshit