SLÄSCH, OIDA!

Wias da Wauzi scho audeit hot, bei uns woa wieda amoi es Släsch-Festival in da Stodt. Und gottseidank san des ned die gsommetn Video vo Gunsändroses, sundan des is es Festival vom fantastischn Füm, meist mit urndlich Bluad und Beischl. Des mog i sea, weu i jo eigentlich von Uasprung hea vom Gruslinga kumman tatat. I mog´s hoit, wann a Leich im Rinnsoi liegt, und es Bluat rinnt in Kanäu, wann de Dodn an de Bana vo de Lebendichn kiefln und wann da schwoazze Mau de klan Kinda aus da Hapfn fischt und in Wuaschtkessl guad aufkochn losst. Do wiad ma woam ums goidane Weana Heaz…

Und weus wegn dem gwesn warat, kummt jetz a klane Rückschau auf es Festival vo den Joa und de Füme, de wos i ma augschaut hob. I hätt jo jedn Tog dreimoi gehn megn woin…

SEOUL STATION   
No, do hommas jo glei, de Undodn, de wos an de Lebendichn zuzln tan. Da koreanische Animäschn-Meista Sang-ho is ma scho frira mit sein Schweindlkenich-Füm aufgfoin, und a de Zombie-Apokalüpsn in da Hoitstö Seoul is guad glungan. De Zombie reißn oin urndlich es Beischl ausse, wia sa se gheat, und stopfn dafia a Gsöschoftsgritig an dena Koreana ian Hang zum Gleichschritt und zua Wuaschtichkeit gegniwa ondare  glei wieda noch. Und wia sa se fia an Zombiefüm a gheat, kummt des ois in an Kaufhaus zum bittan End. Mit an Twist, wo si da Shambalaya no wos oschneidn kunntat.

BUSANHAENG (Train to Busan)   
So, Heaschoftn, genau aso, und ned ondas, so muass des sei. A Zombie-Füm fia de Ewichkeit. A Realfüm-Fuatsetzung von obrichn Zeichntrickfüm von söwn Resischöa. Spüt si ois in an Zug o, dea wos vo da Hoitstö Seoul aufs Lond fohrat, und wo scho wieda de Undodn dena Foagäst es Eitrige ausn Buckl reißn und owewiagn. Quasi ochtazwanzich Tog noch Snowpiercer. Oda: De rasende Geistabahn vo de schmatzendn Leichn. Und des hoit ois, a Sponnung, a Murds-Äktschn, an Schmäh und wia imma bein Sang-ho an Haufn Eiblick in die dunklen Seitn vo da menschlichen Natua. Den an oda ondan wiads vielleicht zvü Melodrama sei, mia kau des ned passian. Vielleicht da letzte große Zombie-Füm. Wos soi no kumman?

MEI REN YU (The Mermaid) 
Oiso, I hob mei Lebtoch scho vü Schaasfüm gsegn, owa no ned vü, de wos mit den hättn mithoitn kennan. A unglaublicha Bledsinn! Da ostasiatische Hamua in seina tiafstn Form. Wea wo wos japonesische Fernseh-Schaus kennat, des is no de ganz feine Klingan dagegn. Ma kau se des vom Hamua-Niwau ungefähr so vuastön wia an bsundas deppatn Bad Spänzer und Täränz Hill-Füm, nur min Moik und in Hias, weas no kennt, Gott hobs sölich, se soin ned zruckkumman. Do foit ma grod ei, de woan jo amoi min Stadl bei de Chinesa! Vielleicht is do wos hänganbliam. HIAS stott SARS…

KURIPI: ITSUWARI NO RINJIN (Creepy)     
Da Kiyoshi Kurosawa hots jo ned so wia da ondare Kurosawa mit de Samurai, sundan mea mit de Gschpensta und de Meada. Und da Fümtitl haut hi. Vo Aufaung au host a oag unguades  Gfüh, ohne dass d wissast wohea. Am End vom Füm waaßt dafia um so mea wohea. Es Problem is nua, da Kiyoshi baut supa a Spannung und a  Geheimnis auf, des wos si imma mea so steigan tuat, dass d waaßt, dass de Auflesung ned wiad mithoitn kenna. Und so kummts a, zumoi si a wieda zagt, dass da Zuafoin imma no da beste Inschpekta is. Owa bei de meistn soichn Füm wiads gengans End zua a bissl deppat, wanns amoi soweit is, doss de Lampln de Pappn hoitn.

I AM NOT A SERIAL KILLER    
Wann wea mant, ea miassat unbedingt a so a Onsog mochn, dann kummt da Zweife gaunz vo söwa. Owa, es is no kompliziata. Weu do muass ana, dea wos eigentlichvo da Aulog hea a Serienmeada warat, owa dea wos kana sei mechat, an ondan Serienmeada jogn, dea wos es Problem min schlechtn Gwissn ned auf d Wog bringt. Oda is es no kompliziata? Ned schlecht, owa do a Entteischung, weu mia de Biachln goa so sea taugt hom. I hätt ma des eha ois an Blockbasta vuagstöt ois ois an klan Independent-Füm.

ZAN’E: SUNDE WA IKENAI HEYA (The Inerasable)   
Japanische Geista san jo es entrischte, des wos gem tuat. Mit de longan schwoazzn Hoa, und wias a scho so schaun tan… Dea Füm vasucht wos Neichs, indem ea in Fluch so aufbaut, ois warat dea a Zwiefe. Hinta jedn Vuafoi steht a ödare Gsdchicht, dahinta no a ödare Gschicht, und so weida. Nua bringan de Gschichtn söwa nix neichs und so valauft si des ois  wira Sojasoß auf an Sashimi. Und weas wissn mog, da doch a bissl ausfirlichare Origineutitl haaßt so ungefähr: „Restln: Es Zimma, in den wos kana wohnan soitat.“

ARE WE NOT CATS   
Jo, wos mit Gadsn kau ma si imma auschaun, wegn an Scheißhundsviech tatat I ned ins Kino gehn. De san ma zu sea wia de Menschn. In den Füm geht´s um an, des wos ganz allanich is, kana mog eam. Und außaden tuat ea gean seine eiganen Boathoa fressn. Denentsprechend hauta se mit ana auf a Packl, de wos a gean ihre Hoa frisst. Und seine a. Es zeigt si nua, dass a Menschmogn hoit ka Kotznmogn is. A Füm, dea wos aundas is, owa a austrengand. Weu sogoa fia ochtasiebzich Minutn goa wenig Gschicht drin is.

Ois in oin kau i wieda nua sogn: A recht liabs Dankschee an es Släsch-Team, hobts wieda leiwaund gmocht. Mia hom glocht, mia ham gwant, mia hom ziddad, mia hom gschpiebn – genau wias sei soi in Kino!

Und zum Beweis, doss i eh wirklich duatn woa und mia ned nua olle Füm ausn Intanetz oweglodna hob: Des untan Pfeu do bin i, auf an Foto vom Släsch-Blog. Und na, i bin ned eibüslt, i lahn mi imma so letschat zruck in Kino. Vua oim in Fümcasino, weu duatn de Leinwand so hoch omad aufghängt is.