L´ÉTRANGE FESTIVAL XXII – Wer da Justine den klan Finga reicht …

Wos bei eich in Wean des /SLASH FILM FESTIVAL is, des is bei uns in Paris des L’ÉTRANGE FESTIVAL. Jedes Joahr gfrei i mi aufs Programm und aufn neichn Sono Sion, weu der is imma dabei – hot er do allanich 2015 sechs Füm gmocht, und des Joahr wieda zwa. I bin jo seit LOVE EXPOSURE sei ergebensta Wauzi, weu der mocht an auszucktn Füm nochn ondern. Des taugt a dem Frédéric Temps, der wos scho seit 22 Joahr Füm aussuacht (oiso no länga ois unsa Hans fir die VIENNALE !), wosd aufpassn muasst, dass da de Guckerln net austrickan wia bei da Ludovico-Therapie. Do hobn donn sogoa die Verleiher in Fronkreich an Beistrich in da Untagattinga, und traun si net, die Füm ins Kino zbringan. Die Vurstöllungan san grammlt voi – mit Gstoitn, wosd nimma sicha bist, wo fongt die Leinwond an und wo hearts auf…

LAS TINIEBLAS (The Darkness) 
Daniel Castro Zimbrón, MEX 2016.

Eröffnungsfüm. Jo jo, im finstan Woid is guat Federn hobn. A einsome Hittn. Da Voda kämpft mit seine drei Gschroppn ums Übalebn. Nur da große Bua derf mit eam in Woid eine, mit Gummifotzn und ana Krochn, weu do is a gfährliches Irgendwos, des ma nie siacht, oba heart. Die ondern zwa miassn si daweu im Kölla versteckn. Ois da Papa nua mea allanich zruckkummt, wü da Klane endlich wissn, wos do los is und poscht o… Da Zimbron fiahrt di a weng am Heampa umadum, oba ma riacht recht schnö, das net ollas so is, wias ausschaut. Klingt a  weng nach Shyamalan, isses a.

 

TERRA FORMARS 
Takashi Miike, JAP 2016.

Aufm Mars nix neichs. Schod, ongfangan vom BLADE RUNNER über die ALIEN-Füm und STARSHIP TROOPERS is ollas okupfat, mitn Nochteu, dass de Gschicht hint und vurn net zsommpasst und olle nur mea Bledsinn redn und mochn. Ma soitat si jetzn den Manga eineziagn, weu der woa so a Erfoig, do muass afoch mea drinnan steckn. Mit de Kakalakn haust di oba volle nieda !

 

ANTI-PORN 
Sion Sono, JAP 2016.

Zum 45. Geburtstog von de Roman Porno hot si die Nikkatsu fünf Haxn von fünf Hentai bestöllt, und do derf da Sion Sono natürlich net föhn. Noch da erstn Viertlstund bin i oba scho mitn Oasch umadumgruckt und hob ma denkt ‘‘a schlappe Partie“ – auf amoi pockt da Sono so richtig aus, weu des woa nua des Vurspü ! Weu donn wechslt er die Stöllung, nimmt sein Füm von hintn und schuastat eam vom antifeministischen Porno in an feministischn Antiporno. Da Sono warat jo net da Sono, wenns net drunter und drüber gangat.

 

GRAVE 
Julia Ducourneau, FRA 2016.

Do soi no amoi ana sogn, de jungan Pupperln san a zoartes Geschlecht ! Die Julia gibt mit ihrm erstn Füm glei Voigas, dass di in Sessl einedruckt. Am bestn is – wias a bei mia woa – ihr wissts so guat wia nix von da Hondlung, weu die draht si wia die Bim im Jonasreindl. Und haberts vurher net zuvü Zwiefeschmoizbrot, weu bei dem, wos die klane Studentin Justine do ausleffln muass, brauchts an guatn Mogn. Die Julia wiedarum braucht net literweis mitn Bluat umadumspritzn, die schofft mit an anzign Finger vü Ärgeres… Neigierig gwurn ?

 

THE MARRIAGE OF REASON AND SQUALOR 
Jake Chapman, GBR 2015.

Obschlussfüm. Wenn oba sogoa die Kapazunda von so am Festival an Rappl kriagn und sie reihnweis ausm Soi schleichn, hot da Chapman ausgschissn. Der muass nämlich fett wia a Radierer gwesn sei, wia er sei 4-teulige Fernsehkastl-Serie draht hot, und angschitt wia a Hydrant, wie ers zu am Spüfüm zsommgsticklt hot. Es warat gscheida gwesn, i hättat mi mit de ondern üba d’Heisa ghaut, weu de san sicha auf a poar Hüsna gongan, oba naa, i muass jo wieda pickn bleibn wia a Kautschi und donn allanich saufn geh.

D’Ehre.

Zum Festival : http://forumdesimages.fr/les-programmes/etrange-festival-2016