De Menschn hom si in Wödraum ogsetzt, hom ian Keapa aufgem und haun se jedsmoi, nochdems ausn Abraham sein Wuaschtkessl aussegfischt wuan san (wia a imma des unta de Umständ genau gehn soi), glei in an Compjuta und lem nua mea in da Vörtuäl Riäliti weida. Wos recht praktisch is, weu de brotn olle in gonzn Tog an an virtuön Straund, ohne dass se schwitzn miassatn und ohne dass eana da Sond in olle Ritzn kreuat. A poa Wüdwestromantika lem owa no untn auf da Erdn und mochn an auf Mäd Mäx.
Auf da r Erd warat nämlich schon wieda amoi a Apokalüpsn gwesn, nix genaues waaß ma ned. Iagendwos mit Nano. Nona ned Nano, in da Zukunft wiad eh ois mit Nano sei. Außa es is wos mit Gene. Owa do bin i dagegn. In mei Popcorn loß i kan Gen eine. Und Nano scho goa ned. Oda so. Weu stö da vua, du host iagendwo an Gen in Keapa! Wos do ois passian kau!
Ane vo de virtuön Strandhosaln wiad dann auf d Erd owegschickt, an hamlichn Häcka suachn, dea wos se vo untn om eimischt. Dafia muass sa se in Reagenzglasl an neichn Keapa aufbochn lossn, zum Eineschlupfn. Wea de oidn japonesischn Dreckantn kennt, glaubt glei, dass des nuuuua a Zufoi sei kau, dass si bein Bochn auf de Gschwinde nua da Keapa vo ana Sechzehnjährign ausgeht. Und goa vü Gwand homs grod a ned featig ghobt.
Wia sa se mit an vo de Kauboi zsammtuan muass, leana muss, dass a echtes Gordon gschmackiga is ois a programmiates, sogoa mit Sand zwischn d Zähnd, dass ma in da echtn Wöd noch an Faustbussal bliat und dass an sogoa a Schnupfn drei Tog in d Hapfn schmeißn kau, des is a gaudiges Baddi-Muwie. Dann kummt no a Maschin dahea, de wos si mea gspüat ois de Menschn, de wos freiwüllich zua Maschin wuan san. Und soichane Gschichtn kennan de Japonesa afoch dazöhn. Mit in notwendichn Anteu vo Filerassafie und dazu vü zvü Gfü.
In de letztn zwanzich Minutn gibts leida nua mea Mecha-Äktschn mit urndlich Blechschodn. Und wann se so japonesische Riesnrobota auf de Bluatwiesn haun, kau se de Filerassafie nua mea am Rücksitz auschnoin. Damit knautscht se da Füm sei hintas Ende auf da Zügerodn no a bissl zsamm. Do hüft ka Nano und ka Gen mea.
Wia imma nua auf DeVauDe.
J 2014. Regie: Seiji Mizushima. Buch: Gen Urobuchi. Darsteller: Rie Kugimiya, Shinichirô Miki, Hiroshi Kamiya. 104 min.
Füme, dies eich dazu furtbüdendaweis auschaun kennts:
(draufklickn, und es kummts zua Internet Movie Database)
Le Füm-Blog 