Scho es dritte Moi, dass de Valeria Bruni-Tedeschi Reschie, Biachl und Hauptroin in an bei an Füm mocht. Se spüt a neurotische Schauspülarin, de wos vazweifen tuat, weus ned schwonga wiad. Ia gstopfte Itaka-Famülie geht langsam in de Bliah und muass jetz eana Schloss vakaufn. Und da Bruadan, dea wos AIDS hot, is scho dabei, si an Plotz auf da nächstn Woikn zum resavian.
In richtign Lem kummt de neurotische kindalose schauspülate Valeria aus ana reichn Itaka-Famülie, de wos eana Schloss in Italien hom vakaufn miassn, und da Bruadan vo da Valerie, dea wos AIDS ghobt hot, hot vua a poa Joa a Bankl grissn. In ian easchtn Füm is drum gongan, wia zach des so is, wamma aus ana reichn Famülie kummt; in zweitn Füm um des, wia zach des so is, wamma a Schauspülarin is und si ned und ned a Gschroppn eistön wü.
Oiso, wann i des ned scho vua kuazn da Schülie Delpy autrogn hätt, miassat de Valeria in easchtn Preis im Dopplgängastechn vom Woody Allen fia Weibsbüda oraman. Mei Lem – meine Füm.
Na guad, da Heagott hot an großn Tiagoatn, wo vü Viecha Plotz hom. Oiso gibts iagendwo a a stüs Eckal fia de oaman gstopftn Madln und eanare Bagasch, vo de de Valeria so gean dazöht. Duat sitzt a scho de Asia Argento. Owa ned füttan, no kennan sa se ia Fressn söwa zoin. Samma nua froh, dass uns deamoi ia Schwesta easpoat bliem is, de Oide vom Sarkozy, in Schrumpfnapoleon.
Da Füm is bei uns nua im Fernschaun grennt, natirlich aufn deitsch-französischn Büdungskanäu.
F 20153. Regie: Valeria Bruni-Tedeschi. Buch: Valeria Bruni-Tedeschi, Noémie Lvovsky, Agnès de Sacy. Darsteller: Valeria Bruni-Tedeschi, Louis Garrel, Filippo Timi, Marisa Borini, Céline Sallette, Xavier Beauvois, André Wilms, Marie Rivière. 104 min.
Füme, dies eich dazu furtbüdendaweis auschaun kennts:
(draufklickn, und es kummts zua Internet Movie Database)
Le Füm-Blog 