A Episodnfüm um Kriegsrepurta in Kabul. Da Füm fiat de schene Tradition östarreichischa Fümressischöarinnan fuat. Zumindest protenzuell steh ma da ganz guad do, glaub i. Leida fiat ea a zum Teu de weniga schene Tradition fuat, dass olle östarreichischn Füm so ausschaun, ois waratns hamlich entweder vom Haneke Maikl oda vom Seidl Ulli gmocht wuan. Owa, de Frau Eder hot se redlich augstrengt, amoi wos ondas zum Mochn.
In da Episodn Ans spüt da Erwin Steinhauer an Reporta, dea wos eigentlich am Weg nach Kabul warat, owa am Flughofn Schwechat an serbischn Kriegsvabrecha stokn tuat. In da zweitn Episode tatat a ameriganische Repurtarin fost ois fia ia Karriere tuan, wias in Skandäu um a Koranvabrennung reschaschian tuat. In drittn Teu haut se a a ondara Repurta in ana Mischung aus Zynismus und Ekel vua da Wöd sei Lebn zsamm.
De easchte Gschicht is de unnedichste, de homs nua fia de östarreichische Fümfördarung draht und damit da Steinhauer bei da Diagonale fia an Togesausflog aufs Flughofnheisl an Preis kriagn kau. Es wiad ned kloa, wos des bringan soi. Nua fian Schlussgäg, dass a zwanzich Joa oida Kriag ka Sau mea intaressiat, wors zwenich. In dera Episodn bricht a da innare Seidl zu seah duach. Do hots zvü vo de ewich unnedichn Ollawödsbüdn, de wos de östarreichischn Füm so oft vaseichn: Da Steinhaua habat an Knedl, da Steinhaua pockt sein Koffan, de Steinhauerin foat am Zimmafoaradl, da Steinhauer steht am Flughofn umananda und schaut, da Steinhauer sitzt am Flughofn umananda und schaut, da Steinhauer geht am Flughofn umananda und schaut, und so weida. Dass ea se glei amoi eiwischalt, wira in Merda eakennt, is a so a tüpische Seidl-Eilog, wos imma glaum, se miassn iagendwos bringan, wos se fia grauslich oda oag hoitn. Dann muass se hoit ana auspeibn, eiwischaln, nockat ausziagn oda a Keazn in Oasch steckn und in Bundesjodla singan. Es unsölich fade Erbteu vom Sechziga-Joa-Reschietheata, wos owa seit zwanzich Joa ned amoi mea in da Josefstodt wen aufregn tuat.
De Episodn Zwa is de beste. Do wiad schee noch olle Seitn austeut, wia sa se gheat. De Frau Repurtarin hot min Sexismus vo de Islamistn ned mea zum kämpfn ois mit dem vo de Kollegn und de ameriganischn Soidotn. Des is ned sea subtü dazöht, wiad owa so hikumman. A sea lustig, owa genauso min Hoizhomma, de Britni-Schbiers-Eilog. Bein Intavju mit de Koraneihaza aus de ameriganischn Kukuruzföda schiaß ma dann wieda so weit übas Zü hinaus, dass da Seidl sei Freid hätt. Trotzdem a stoake Szenan, de an scho au de Niandln geht. In Afghanistan schoffts de Frau Eder a, se vo de östarreichischn Kuchlbüda zum lossogn. Dünamische und dichte Büdln, wia mas bei uns ned oft siacht. De östarreichische Kathryn Bigelow quasi. Lustigaweis homs vuan Füm a Vuaschau fia WHISKEY TANGO FOXTROT zagt, wos um genau de gleiche Gschicht geht, sogoa wieda mit ana Repurtarin!
De Episodn Drei is a ganz guad, de zweite hot owa scho ois gsogt, wos zum sogn woa.
Ma deaf a ned vaschweign, dass de Frau Eder in de letztn zwa Gschichtn sensationelle englischssprochige Auftritt aus an sich deitsschsprochige Schauspüla aussekitzelt, wos eha söltn is.
I bin jednfois sea gsponnt, wos in de nächstn Joa vo da Ederin no so kummt.
Ö 2016. Regie: Barbara Eder. Buch: Barbara Eder, Thomas Pridnig. Darsteller: Erwin Steinhauer, Manon Kahle, Raphael von Bargen, Tamner Abdel Rahim, Saxton Stewart, Ed Ward, Susi Stach, Merab Ninidze, Mohammad Jamil Jalla. 103 min.
Füme, dies eich dazu furtbüdendaweis auschaun kennts:
(draufklickn, und es kummts zua Internet Movie Database)
Le Füm-Blog 
Pingback: WHISKEY TANGO FOXTROT | Le Füm-Blog