Aufs easchte huacht si des wia da perfekte Füm fian Huach au, oiso fian Schef vo da Viennale. Weu dea mog so ölendigliche Gschichtna, wo a oama Keandlbaua aufs easchte Moi mit seina Mähmaschin in de große Stodt foaht, wo wos ea dann heat, wos frira duatn mit sein Vodan passiat warat. Am bestn a no in Schwoazz-Weiß und aus Kasachstan und mit vü langsam Schaun, dafia owa mit ohne Goschn aufmochn.
Und ganz genauso a Gschicht is des, nua dass zum Glick ned in Kasachstan spüt sundan in oidn Indien vua boid viatausend Joa, a ka Mähmaschin ned vuakummt, olle de Goschn weit aufmochn und sogoa singan tan, und außaden da Hritik Roshan in gscheatn Buam spüt. Und an den seine Muskln siecht ma mit in gschuitn Eigl, dass do no an urndlichn Köch gem wiad und dass es Bluad und Beischl so spritzn wiad, dass ohne Technicolor ned geh wiad. Und wia kummts? Genau aufs nämliche.
Da Sarman, des is da Bua, kommt oiso in de Stodt und wü eigentlich nua seine Keandln am Karmelitamarkt an de Bobo vascheaweln. Nua is duatn grod da Sandokan da große Zampano, und dea is ka guada ned, und bevua s d no gscheid „Let mei pipl go!“ sogn kannst, pudlt si da Sarman scho urndlich auf und mocht an auf Tschegewara. Dass ea si in a Madl vaschaut hot, des wos in unnedichn Sohn vom Sandokan heiratn soi, tuat no es seinige dazua. Und kloa is, dass da Schpartakus, … na da Maximus, … na da Ben Hur, … heaschoftszeitn da Sarman de Gfrasta so oag biana tuat, dass si sogoa da Moses vua lauta Fedan a Puffn kaufn tatat.
Gottseidank is da Gowariker ana vo de wenign Bolliwud-Resischöare, dea wos seine Gschichtn a mit da eafoadalichn Eansthoftigkeit dazöhn kau, sunst hätt des a rechta Schaas wean kenna. So kriag ma a recht urndliche Äktschngschicht, de wos si zum Teu a bissl zaht, dafia owa a recht iwazeigende Vuastöllung gibt, wia des so vua a poa tausend Joa vielleicht gwesn sei kunntat. Dazu losst da A. R. Rahman im Orchestagrom sein innan Hans Zimmer ausse – oiso eigentlich in innan Dimitri Tiomkin, owa waunn i des sog, waaß jo wieda kana, wea des is – jednfois: es geign de Goidfisch, da Sarman längst am sichan Land.
IND 2016. Regie: Ashutosh Gowariker. Buch: Ashutosh Gowariker, Preeti Mamgain. Darsteller: Hritik Roshan, Kabir Bedi, Pooja Hedge, Arunoday Singh, Umang Vyas, Diganta Hazarika, Manish Chaudhary. 155 min.
Füme, dies eich dazu furtbüdendaweis auschaun kennts:
(draufklickn, und es kummts zua Internet Movie Database)
Le Füm-Blog 