A klane Vurschau – da Füm kummt jo eascht am Freitoch zu uns, owa i hob eam scho vua a poa Joa gsegn. Da Füm is nämlich scho oid, is owa no fost niagends auf da Wöd grennt. Wos des augeht, wieda amoi an großn Applaus fias Buag-Kino und sein klanan Fümvaleih.
Ansunstn is owa bessa ma red goa nix üba den Füm. A typisches Weak aus dera unsölichn Zeit, wo da Schau Lük aufgheat hot, richtige Füme zum mochn, und nua mea sinnlosn Awaugaa-Schas gmocht hot. Nämlich no mea ois bis dahi scho, und des muasst a eascht amoi zsammbringan. Es muass eam noch dreissig Joa Hianwixn iagendwos in sein Hian endgültig duachbrennt sei. Oda vielleicht wora mit seina Hockn ois Käptn vo da Entapreis so ausglost, dassa ka Zeit mea ghobt hot, Biachln zum schreim, de wos länga woan ois auf a Serviettn passt hättat.
Da Füm is unbeschreiblich unbeschreiblich, de Schauspüla stengan umananda oda hatschn duachn Woid und tan Schäksbia aufsogn oda no schlimma, iagendwos, wos da Schau Lük gschriem hot, des wos no weniga sogt. Dazwischn a poa Eiblendungen ohne Aussog und vü Möwngschra. Warum a imma… Ma muass in Käptn owa lossn, dassa innalich jung bliem is. Weu ausschaun tuat des ollas wia da easchte Fümvasuch vo an Zwöfjährign.
Wanns in Buag-Kino wos guats tuan woits, dann schautsas eich au. Wanns eich söwa wos guats tuan woits, dann ned.
USA 1987. Regie & Buch: Jean-Luc Godard. Darsteller: Peter Sellars, Molly Ringwald, Burgess Meredith, Jean-Luc Godard, Leos Carax, Julie Delpy, Norman Mailer, Kate Mailer, Woody Allen, Suzanne Lanza, Freddy Buache. 90 min.
Füme, dies eich dazu furtbüdendaweis auschaun kennts:
(draufklickn, und es kummts zua Internet Movie Database)
Le Füm-Blog 