Oiso, des faungt au mit an Untawossaschinakl, in den wos olle umandaruachln, weus ka Luft mea ham. Auftauchn kennans owa a ned, weus a Schwoazpuiva glogat ham, und wengan Wossadruck oda so tatat des dann ofackln. Mittn in des Schlamassl plotzt a kanadischa Hoizfölla eine, dea zufällich a in des Schiff grot (des wos grod am Grund vom Wossan is, diafts ned vagessn). Daweu hot ea eigentlich sei Freindin gsuacht, de wos vo an Haufn Reibasleit in a Höhln vazaht wuan is. De Freindin wiedarum, de unsölichaweis es Gedächtnis aubaut hot, de tramt in da Nocht davo, dass a Sängarin in an Giatlkaffee warat, de wos vo an mexikanischn Vampia vafoigt wurdat. Da Bluatschlecka wiad dann zu an Wuam, dea wos ia de Gschicht vo an dazöht, dea wos sein Kommadiena hamdrahn muass, damit dea ned aufdeckn kau, dass da Schef vagessn hot, seina Frau zum Purzltog wos zum kaufn und ia statt den … Moment – do hob i jetz de Gschicht auslossn von den, dea wos an Kalamari gflaucht hod und dem deswegn a Vulkan an Sta am Schädl schmeißt*. Owa wo genau gheat des no amoi eine? Und dabei is des ois eascht da Aufaung vo dera Gschicht…
Es glaubts, i hoit eich zum Noarrn? Bittschee:
Ois kloa?
Wea eam no ned kennt hot, dea hot spätestens jetz ogspeichat, dass da Guy Maddin ana vo de varrucktestn Fümemocha is, de ma hom. Im Prinzip mochta imma Stümmfüm, nua ned mit ohne Ton. Des is oft a Gaude, oft is a zach. Auf wosa genau ozüht bei den, des hob i a noch fünfazwanzich Joa no ned übanosat.
Sei Fantasie is hoit erstaunlich und kennt ka Moß und kane Grenzn, de Büdl san a Waunsinn und de Speschal Effex a Schau. Es is, ois ob mehrare oide Füm vabrennan und inanda zsammschmözn tatatn. Metaforisch wia wirklich.
Da Aufbau erinnat übrigens sea an in CLOUD ATLAS (Der Wolkenatlas), und zwo an den vom Biachl vom David Mitchell, da Füm woa ondascht aufbaut. De Gschichtn vaschochtln se vo außen nach innan wia bei ana Matroschka, zua Höfte von Füm draht ses wieda um und de Gschichtln wean quasi vo innen nach außn fertig dazöht. Wia gsogt, faszinierend, owa a anstrengand. Und woascheinlich sinnlos.
* Von dohea stammt da oide Spruch: Bessa in Tintnfisch in da Hand ois an Sta am Schädl.
CAN 2015. Regie: Guy Maddin, Evan Johnson. Buch: Guy Maddin, Evan Johnson, Robert Kotyk, John Ashbery, Kim Morgan. Darsteller: Roy Dupuis, Clara Frey, Louis Negin, Udo Kier, Mathieu Amalric, Geraldine Chaplin, Amira Casar, Maria de Medeiros, Ariane Labed, Charlotte Rampling, Gregory Hlady, Noel Burton. 130 min.
Füme, dies eich dazu furtbüdendaweis auschaun kennts:
(draufklickn, und es kummts zua Internet Movie Database)
Le Füm-Blog 