Jo, eh. Griaß eich zruck. Yoroshiku onegai shimasu.
De Doris Dörrie steht sis auf Tschäpän. Des geht a in de Urdnung, do kau ma nix dagegn sogn. Is owa ka Entschuldigung, dass se dauand fade Füm duatn mocht. De Japonesa san jo sea hefliche Leit und sogn nix. Außaden nemans so a doikate Gaijin wohrscheinlich eh ned fia voi. Insofean wiads eana wuascht sei. Bei da Doris is hoit imma ois so vakopft. Und so ausdocht. Und so aufgsetzt bedeitungsvoi und künstlarisch. Tsumanaranai to omoimasu. Baka da to omoimasu.
De Hauptdoastöllarin sogt amoi üba si söba, dass a bledes, vawehntes Scheißgöa is, und a do kau ma nix dagegn sogn. Allanich scho, wann wea noch Fukushima foaht, dass ma duatn fia de oaman Leit Klaunspü auffiaht und dann glaubt, ma tuat da Wöd wos guats. Da kriag i soichane Koweln bei sovü Bledheit und Arroganz. Sugoi baka na hito da yo. Und dann trifft des unnediche Mensch in da vaseichtn Zonan natirlich a oide Geischa, vo dea wos se weatvolle Lektionan fias Lem kriagt. Eh kloa. De wos se hauptsächlich um des drahn, wia ma in Deckl vom Teehefal richtig aufn Tisch legn tuat! Yamete kudasai!
Schee gmocht san de Obake, de Gschpensta vo de in Tsunami Dasoffanen. Da san da tödlichn Doris hoibwegs neiche Büdln eigfoin, und des haaßt scho was, weu de Japonesa san de Masta vo de Fümgschpensta. De Sadako woa owa eh ned dabei.
Und wos den an Tachiniera mitn entrischn Kotznschädl augeht, dem hätt i stundnlang zuaschaun kenna, obowoi ea genau nix mocht. Kowakute kawaii!
Itte kimasu. Ich gehe und komme wieder.
D 2016. Regie & Buch: Doris Dörrie. Darsteller: Rosalie Thomass, Kaori Momoi, Moshe Cohen, Aya Irizuki, Nanoko, Nami Kamata. 108 min.
Füme, dies eich dazu furtbüdendaweis auschaun kennts:
(draufklickn, und es kummts zua Internet Movie Database)
Le Füm-Blog 