Bei da guadn Schülie Delpy hob i imma in leisn Vadocht ghobt, dass de a hamliche Tochta vom Woody Allen und da Diane Keaton is. Dafia is dann do a bissl z oid. Owa ihre Füme in da eigananen Reschie tan se scho imma sea aun an Woody aulahna, wanns ned grod in Richard Linklater nochmocht. Es neurotische Gschau und es Nervenschwoche hots dafia kloa vo da Diane. Außadem trogts ähnliche Fetzn auf.
Hia is de Schülie a Bobo-Mama mit an ausgwochsanen Gschrappn, dea no imma bei da Mama wohnan tuat und a fia imma und ewich da Mamsch ihr Himbeerbua (© Christoph Mauz) bleim wü. Wia de Schüli wieda amoi an neichn Hawara hamzaht, taugt des in Burli natirlich goa ned. Er tuat urdentlich dagegn hoitn und intrigian, ohne dass de Mama des übareissn tatat. Des fongt hormlos a, bis imma klora wiad, dass da Burli a festa Psücho is.
A füm mit zwa Stimmungen, de se untarananda ned imma grean san. Eigentlich a leichtes Lustspü, de Eilogn vom Burli und des ungsunde Vahötnis zua Mamschi gehn dafia scho ins Finstararere. Sowoi da Hamur wira a de besn Eilogn wean eha untaspüt, do hätt ma a mea aufdrahn kenna und deitlicha wean kenna. Es passt owa eh wias is, mea hätts ned sei soin. Intaressant warat, wos de Amerigana in an Rimäk draus mochn tatatn.
F 2015. Regie: Julie Delpy. Buch: Julie Delpy, Eugénie Grandval. Darsteller: Julie Delpy, Dany Boon, Vincent Lacoste, Karin Viard, Antoine Lounguine. 99 min.
Füme, dies eich dazu furtbüdendaweis auschaun kennts:
(draufklickn, und es kummts zua Internet Movie Database)
Le Füm-Blog 